काठमाडौँ । वीपी कोइराला स्वास्थ्य विज्ञान प्रतिष्ठानले इन्टर्नसीप विद्यार्थीको पारिश्रमिक सम्बन्धन अध्ययन गर्न समिति गठन गरेको छ । निमित्त उपकुलपति तथा शिक्षाअध्यक्ष प्राडा सन्जिव कुमार शर्माले ९ सदस्यीय समिति गठन गरेका हुन् ।
परीक्षा डीन प्राडा कृष्ण पोखरेलको संयोजकत्वमा समिति गठन गरेर ५ दिनभित्र प्रतिवेदन पेश गर्न भनिएको छ । विद्यार्थीहरूले इन्टर्नसीपको भत्ता बढाउनुपर्ने माग राख्दै आन्दोलन गर्दै आएका छन् ।
वीपीले हाल १८ हजार ३०० रूपैयाँ निर्वाह भत्ता दिँदै आएको छ । विद्यार्थीहरूले २५ हजार पुर्याउनुपर्ने माग राख्दै विद्यार्थीहरू आन्दोलन गर्दै आएका हुन् ।
सोही विषयमा शिक्षाध्यक्षले अन्य विश्वविद्यालय तथा प्रतिष्ठानमा भएको व्यवस्था समेतको अध्ययन विश्लेषण गरी उचित राय, सुझाव तथा सिफारिससहितको प्रतिवेदन पेश गर्ने कार्यादेशसहित समिति गठन गरेका हुन् ।
वीपीमा विद्यार्थी कल्याण समाज तथा प्रतिष्ठानसँगै धरान इन्टर्न संघर्ष समिति मार्फत आन्दोलन गर्दै आएका हुन् । उनीहरूले इन्टर्न गरिरहेका विद्यार्थीहरूको पारिश्रमिक भत्ता बढाउन र अधिकृत तहको ५० प्रतिशत रकम हुनुपर्ने माग अघि सारेका छन् ।
