लन्डन । इङ्ल्यान्ड टेस्ट क्रिकेट टोलीका पूर्व कप्तान जो रुटले शुक्रबार आयरल्याण्डविरुद्धको टेस्टमा ५६ रन बनाए । योसँगै उनले आफ्नो १३० औं टेस्टमा ११ हजार रन पुरा गरेका छन् । यो कोशेढुंगा पार गर्ने उनी दोस्रो कान्छा खेलाडी बने । यसअघि इंग्ल्यान्डका एलिस्टर कुकले ३१ वर्ष ३५७ दिनको उमेरमा ११ हजार रनको आँकडा पार गरेका थिए ।
रुटले पछिल्ला साढे दुई वर्षमा १२ शतक बनाएका छन् । यदि उनले आफ्नो फर्मलाई निरन्तरता दिए भने साढे तीनदेखि चार वर्षमा उनले सचिन तेन्दुलकरको सबैभन्दा धेरै टेस्ट रन बनाउने कीर्तिमान तोड्नेछन्। सचिनले २०० टेस्टमा १५ हजार ९२१ रन बनाएका छन्। उनीसँग हाल ११,००४ रन छन्, उनले आफ्नो २३८ औं इनिङ्समा यो कोसेढुङ्गा पार गरे । समग्रमा रुट ११ हजार टेस्ट रन बनाउने ११ औँ खेलाडी हुन् । इनिङ्सको हिसाबले श्रीलंकाका कुमार संगकाराले २०८ इनिङ्समा ११ हजार टेस्ट रन पुरा गरेका थिए । यस मामिलामा रुट आठौं नम्बरमा छ।
१३ डिसेम्बर २०१२ मा भारत विरुद्ध आफ्नो टेस्ट डेब्यू गरेका रुटले २०२० सम्म ९७ टेस्टमा १७ शतक र ४९ अर्धशतक बनाए । यस अवधिमा उनले ४८ को औसतमा ७ हजार ८२९ रन बनाएका थिए । सन् २०२० सम्म १७ शतक बनाएपछि रुटले पछिल्लो साढे दुई वर्षमा ३३ टेस्टमा १२ शतक र ९ अर्धशतक बनाएका छन् । यस क्रममा उनले ३ हजारभन्दा बढी रन पनि बनाए । अर्थात् सन् २०२० सम्म रुटले करिब ६ टेस्टमा शतक प्रहार गर्ने गर्दथे तर पछिल्लो साढे दुई वर्षमा उनले प्रत्येक तेस्रो खेलमा औसतमा शतक बनाएका थिए ।
सचिन तेन्दुलकरले आफ्नो २०० टेस्ट करियरमा १६ हजार ९२१ रन बनाए, जुन टेस्टमा सबैभन्दा धेरै रन बनाउने रेकर्ड हो। उनी र दोस्रो नम्बरका खेलाडी रिकी पोन्टिङबीच २ हजार ५ सय ४३ रनको ठूलो अन्तर छ। अर्थात सन् २०१३ मा सन्यास लिएपछि १० वर्षसम्म उनको नजिक पनि कुनै खेलाडी आएनन् । अहिले रुट जुन फर्ममा ब्याटिङ गरिरहेका छन्, उनले यो कीर्तिमान छिट्टै तोड्न सक्छन् ।
रुट अहिले ३२ वर्षका भइसकेका छन् । उनको हाल ११,००४ रन छ, जसको मतलब सचिनको कीर्तिमान तोड्न ४,९१८ रन आवश्यक छ। रुटले १ जनवरी २०२१ देखि ३३ खेलमा ३ हजार १८१ रन बनाएका छन् । अर्थात् उनले एक खेलमा ९६ को औसत रन बनाएका छन् । यो गतिसँगै उनलाई सचिनको कीर्तिमान तोड्न करिब ५२ खेल लाग्नेछ ।
