एटीएमबाट पैसा निकाल्दा थप शुल्क नलाग्ने भएको छ । अब देखि जुनसुकै बैंकको एटीएमबाट पैसा निकाले पनि थप शुल्क नलाग्ने भएपछि ग्राहकहरुलाई पनि सहज हुने भएको छ । यसअघि नेपाल राष्ट्र बैंकले कोरोनाको त्रास रहुन्जेल सम्मका लागि मात्रै यो व्यवस्था लागू गर्न बैंकहरुलाई निर्देशन दिएको थियो । तर अब सँधैका लागि शुल्क नलिन राष्ट्र बैंकको भुक्तानी प्रणाली विभागले निर्देशन दिएको हो ।
लकडाउनका बेला बैंकर्स संघले नै शुल्क नलिने बताएको थियो । लकडाउन खुले पछि पुनः शुल्क लिन थालिए पनि राष्ट्र बैंकले कोरोना महामारीको बेला सम्म भन्दै निःशुल्क गर्न मौद्रिक नीतिमै व्यवस्था गरिएको थियो । ग्राहकको भिड कम गर्न र डिजिटल कारोबारलाई प्रोत्साहन गर्न भन्दै यस्तो निर्देशन गरिएको राष्ट्र बैंकले जनाएको छ ।
