चितवन– सशस्त्र द्वन्द्वको समयमा चितवनको माडीस्थित बाँदरमुढेमा भएको घटना सम्झँदै नेकपा माओवादी केन्द्रका अध्यक्ष पुष्पकमल दाहाल प्रचण्डले माडीको बाँदरमुढे घटना द्वन्द्वको समयको सबैभन्दा ठूलो गल्ती भएको बताउनु भएको छ ।
घटनापश्चात दोश्रो पटक शनिबार माडी पुगेका प्रचण्डले बाँदरमुढे घटना द्वन्द्वकालको ठूलो गल्ती भएको बताउँदै घटनाबाट पीडित भएकाहरुले न्याय पाउने बताउनुभएको छ । माडीको बसन्तपुर बजारमा आयोजना गरिएको कार्यक्रममा सम्बोधन गर्दै उहाँले घटनाका दोषीलाई पार्टीको तर्फबाट उतीबेलै कारबाही गरिएकोसमेत बताउनुभयो ।
सत्य निरुपण तथा मेलमिलाप आयोग र बेपत्ता छानविन आयोगले दोषी ठहर गरे जोकोही पनि कारवाहीको भागिदार हुने उहाँले बताउनुभयो । अहिले दुई आयोगको ऐन संशोधन प्रक्रियाका कारण काम हुन नसकेको बताउँदै उहाँले छिटै प्रकृया सुरु हुने बताउनुभयो ।
माडीसहितको क्षेत्र समेटिएको चितवनको क्षेत्र नं. ३ को प्रतिनिधिसभाको उम्मेदवार रहेका प्रचण्ड चुनावी अभियान अन्तर्गत माडी पुग्नुभएको थियो ।
यसअघि २०६९ साल फागुन १७ गत माडी महोत्सवको उद्घाटन गर्न माडी पुग्नुभएको प्रचण्डले पीडितका लागि ६० लाख रुपैयाँ वरावरको प्याकेज कार्यक्रम घोषणा गर्नुभएको थियो । तर, सो रकम पीडितको हातमा पुग्न सकेको थिएन ।
तत्काल सरकार परिवर्तन भएका कारण राहत रकम वितरण हुन नसकेको बताउँदै उहाँले अब बन्ने सरकारले पीडितका बिषय गम्भीर रुपमा लिने बताउनुभयो । आफ्नो पूर्णकालीन राजनीतिक जीवन माडीबाटै शुरु भएकोले अहिले यही क्षेत्रबाट चुनाव उठेको बताउँदै उहाँले देशमा स्थिर राजनीति र विकासका लागि वाम गठबन्धका उम्मेदवारलाई विजयी गराउन अपिल गर्नुभयो ।
दिवाकर–तीर्थकुमार भुषाल स्मृति खुल्ला भलिबल प्रतियोगिताको उद्घाटन गर्न माडी पुग्नुभएको प्रचण्ड बाँदरमुढे घटनास्थलमै भने पुग्नुभएन । माडीका बासिन्दा निकुञ्जका कारण बढी समस्यामा रहेको भन्दै उहाँले अब बन्ने स्थायी सरकारले यो समस्याको स्थायी रुपमै समाधान गर्ने बताउनुभयो । नेपाललाई कम्युनिष्ट आन्दोलनको अन्तर्राष्ट्रिय केन्द्र बनाउने बताउँदै उहाँले समाजवादको मोडल नेपाल बन्न सक्ने बताउनुभयो ।
कार्यक्रममा सँगै पुग्नुभएका एमाले स्थायी कमिटी सदस्य सुरेन्द्र पाण्डेले वाम एकतासँगै अब बन्ने सरकार स्थायी हुने र त्यसले मुलुकलाई समृद्धितर्फ लैजाने बताउनुभयो । चितवनमा प्रतिनिधिसभा र प्रदेशसभाका लागि संयुक्त वाम गठबन्धनको तर्फबाट उम्मेदवार बनेका सबै माडी पुगेका थिए ।
बिस २०६२ साल जेठ २३ गते माडीको बाँदरमुढे खोलामा सर्वसाधारण र नेपाली सेना चढेको बसमा माओवादीले एम्बुस बिस्फोट गराउँदा ३८ जनाको ज्यान गएको थियो भने ७२ जना घाइते भएका थिए ।
जानकारी: रारा सञ्चार अनलाईनलाई तपाई फेसबुकमा (यहाँ), ट्विटरमा (यहाँ) र युट्युबमा (यहाँ) फ्लो गर्न सक्नुहुनेछ ।
